A stu munnu vala sulu… u culu tunnu! La versione rap di una delle più famose poesie di Vittorio Butera, eseguita da Francesco Pantano.
Culu tunnu
A stu munnu
vala sulu u culu tunnu.
Ti nne ridi?
Nun ce cridi?
E ttu piglia na buttiglia:
Senza culu cchi nne fai?
È ‘nnu guai!
L’uagliu funne
E tte cunne!
‘Nu spurtune sculacchjiatu
L’accattere?
U ru vulere
Mancu, criju, rigalatu!
Haju datu,
Stamatina,
‘nu caune de frannina,
Nuavu, nuavu, a ‘nnu strazzatu.
Nu grubbicchjiu cc’era ssulu
A ‘nna natica de culu.
L’ha ppigliatu,
L’hadi ampratu,
L’ha gguardatu
E ll’ha jittatu;
Ed ha ddittu sulu, sulu:
– ‘U ru vuagliu! È rruttu ‘n culu!
Si te capita, ddemane,
‘Na scuppetta senza cane,
Ppe’ sparare pue arranciare:
Ccu ‘nna petra si cce vatti
‘Nu tubettu nu’ ru scatti?
‘Un pue fare nente sulu
Si ‘u’ d’ha cculu.
Cchi ripari?
Cumu spari?
De ‘nu cagnu de ragagnu,
Tina, vutte, varrilazzu,
Me sai dire cchi nne fazzu
Si nun tene ru timpagnu?
‘U’ mm’aggiuva
Nné ppe’ mmustu nné ppe’ d’uva.
Ma si tene ru culacchjiu
Tunnu e ffunnu
È ‘nn’autru cacchjiu!
L’acu è ttuttu
Ma, ‘ntramente,
Quannu cce ha ru culu ruttu,
Caru amicu, ‘u’ bbale nnente!
Ah! ‘Nu culu tunnu, tunnu!
È ru priaju de ‘stu munnu!
Quannu è ttantu
Guardu e ‘ncantu!
Quannu è ggrassu
Viju e ‘ntassu!
Culu musiu
Nun fa scrusciu,
Culu grassu,
Ad ogne ppassu
Natichija e scattarija!
Gruollulija
E abballarija!
Quannu a spassu
Ti nne vai ‘ssu munnu munnu
Iu te viju mme ricriju,
Culu grassu! Culu tunnu!
Pistu, pistu,
Nun rrisistu!
Chjnu, chjnu,
M’abbicinu!
Tunnu, tunnu,
Mi cce junnu!
Grassu, grassu,
Nun te lassu!
Culu pistu,
Culu chjnu,
Culu tunnu,
Culu grassu!
